ლადო გუდიაშვილის მოედანი 2/7 ბეგლარ ახოსპირელის# 2

გუდიაშვილის მოედნის #7 და  ბეგლარ ახოსპირელის# 2-ში მდებარე   მსხვილმასშტაბიანი სამსართულიანი შენობა გუდიაშვილის მოედანსა და ახოსპირელის ქუჩის კვეთაზე დგას. თაღოვანი და სწორკუთხა ღიობებით დანაწევრებული და მესამე სართულის ვარდულებით “დაცხრილული” ფასადები ტფილისისათვის საკმაოდ უცხო მხატვრულ-არქიტექტურული იერით იქცევს ყურადღებას. XX საუკუნის დასაწყისში აგებული შენობა სტილისტურად მოდერნს ‘’Art Nouveau’’ უნდა მივაკუთვნოთ, რის დასტურადაც გვევლინება რკინის შეკიდული აივანი, ხის ორფრთიანი კარის მხატვრულად დამუშავებული ლითონის ცხაური და მარმარილოს კიბის მცენარეული დეკორით დამშვენებული მოაჯირი სადარბაზოს ინტერიერში. შენობა მნიშვნელოვანია მოცემული მიკრო უბნის სივრცითი გეგმარებისა თუ, ზოგადად, ქალაქგეგმარებითი თვალსაზრისით; იგი დიდწილად განსაზღვრავს მოედნისა და ქუჩის მხატვრულ-არქიტექტურულ სახეს.